SA UMAGANG KAGAYA NGAYON

Sa umagang kagaya ngayon
ang mga ulap ay nagkukumpulan
sa bughaw na kalangitan
na aking pinagmamasdan
masuyong tinititigan
pinapangakuan
ng mga pangarap na nakakulong sa isipan
at nanatiling nakatali sa isipan
kahit pa man
sa umagang kagaya ngayon

Sa umagang kagaya ngayon
ang sinag ng araw
ay malumanay na haplos
sa mga matang paminsan-minsan
ay aking ipinipikit
upang maramdaman
ang halik ng araw
na s'yang pumupukaw
sa mga pangarap na nakakulong sa isipan
sa umagang kagaya ngayon

At noon ko na rin natanto
na ang langit
kapag napatagalan mo nang titig
ang mga ulap
kumpul-kumpol man
o dili kaya'y manipis na bulak
ang mga ulap
ay patuloy na gumagalaw
at patuloy na lumalayo

Subalit hindi ko alam
kung ang mga ulap ay nagpapaalam
dahil ako rin ay humahakbang
papalayo
sa pinanggalingan
ng mga pangarap kong nakakulong sa isipan

Bawat araw, bawat linggo,
bawat buwan, bawat taon
bawat hakbang patungo sa hinaharap
bawat panibagong pangarap

ay kamatayan
ng mga lumang pangarap
na hanggang sa umagang kagaya ngayon
lumilipad na mga ulap
sa bughaw na kalangitan
ang mga pangarap na nakalimutan
ay nananatiling nakakulong sa isipan