ULAP NA PAGKAPUTI-PUTI
(SA LABAS NG BINTANA)


Sa labas ng bintana
ay aking nakikita
ang ulap na pagkaputi-puti
ang ulap na pansamantalang
tumatabon
sa kalangitang
akin na ring napagmamasdan
ngayon

Ang ulap na pagkaputi-puti
ay tila bulak
tila sanggol na pagkalambot-lambot
isang ngiting hindi ko na halos matandaan
bagamat nanggaling sa dating hinirang
marahil ay dahil nanggaling sa dating hinirang

Ngayon na nga ang ulap
sa labas ng bintana
ang s'ya ngayong nagdala n'yaring ngiti
sa labi kong hanggang ngayon
ay lumilimot pa rin
ng mga halik mula sa iyong labi

Ulap na pagkaputi-puti
sa labas ng bintana napagmamasdan
ulap na sa wari ay napakalapit
maabot ko kaya
maabot ko kaya ang langit

Ulap na pagkalapit-lapit
sa unang pagtanaw, ako'y napaibig
sa unang pagtingin, ako'y naligalig
sa unang pagkita
ay akin nang natantuhan
na gaano man
naisin kang hawakan

Ulap na pagkaputi-puti
Sa panaginip ko lamang naninirahan

Ikaw,
kasama ng mga
dating
inibig ko rin
minsan