|
Ang Pinto Ko (Ay Laging Bukas)
Ang pinto ko ay laging bukas
sakali mang ikaw ay magawi
sa sulok nitong mundo
kung nasaan naroroon ako
Dahil sakali mang ikaw ay maligaw
sa panig nitong kalawakan
na akin pa ring pinagmamasdan
at pinapakiusapang ikaw ay samahan
Dahil irog hindi ko maatim
na ikaw ay mapanglaw at nag-iisa
kahit hindi ako ang kasama
hindi maatim na lumuha ang iyong mata
Mga matang minsan din naman
ay napatitig sa mga matang
napatitig sa mga matang
ang nakita ay ako
Minsan pa ay tanda ko ang ligaya
ang mga ngiti at masasayang tawa
at mga halik na walang kasing-tamis
at kutis na walang kasing-kinis
Ang hiningang amoy kamia
na sinaluhan ng buntung hininga
at sinabayan ng pagluha
sa ligayang nadama
Giliw, sakali mang ako'y hanapin
at kailanganin ang aking pakikisama
at sakali mang hanapin ang aking haplos
at marinig ang boses bagama't paos
Giliw, nawa'y iyong pakatandaan
na ang pinto ko ay laging bukas
sa pag-asang ika'y babalik
at naghahanap ng aking mga halik
Halik na sa pinto kong bukas
ay s'ya ring halik na ibinibigay
sa iba pang mga bumabalik
|
