|
ILUSYON
Hindi ko alam kung bakit
noong makita ka minsan
minsan lang naman napagmasdan
subalit sa aking isipan
ay 'di na nawala ang iyong larawan
larawan ng isang matang may ngiti
pilit man at bahagya pa mandin
subalit ang namumulang pisngi
at ang mga matang naging mapungay
sa titig ko't haplos
tapik sa namumulang pisngi
at mga daliring umikot sa balikat at noo
ang tanging huminto
ay hindi ang panahon
o ang pag-ikot ng mundo
bagama't ang tanging huminto
ay ang paghinga ko
Dahil nandoon ka at hawak-hawak ko
at maya't maya rin ay yakap-yakap ko
at palagi-laging hinahalik-halikan ko
sa pisngi, sa noo, sa labi, at sa mga kamay mo
Kamay na kasing-puti ng ulap
At pisnging kasing-kinis din
Buhok na nakapungos
Na tila ba tubig na umaagos
At nakikipaglaro
sa mapaglaro ko ring haplos
Subalit bago ko namalayan
kung ako'y nahihibang o nananaginip
bago ko naramdaman
ang malapot na pag-ihip ng hangin
bago ko naunawaan
ang hapding nararamdaman
Ikaw ay wala na
at ang tanging naiwan ay alaala
alaala ng mga matang akin pa ring nakikita
at halik sa pisnging akin pa ring nadarama
at halik sa labing nagnanasa
dahil hanggang ngayon
ang labi mo'y nalalasahan ko pa
|
