LUMBAY

Lumbay
ang nadarama
nitong pusong
muli pa ring umaasa
at naniniwala
sa muli nating pagkikita

Lumbay
at hindi kalungkutan
dahil walang bahid
ng mapanuksong kadiliman
o n'yaring mapaglarong kasalanan
ang sa puso'y naninirahang
hapdi ng kalooban

Hindi ko mabatid
kung ikaw yaong napansin kanina
o baka naman ang mayuming alitaptap lamang
ang s'yang gumuhit ng iyong larawan
sa nahihibang kong isipan

Subalit sa kanyang pagtawa
ay muli ko na namang naalala
ang maninipis na mga labing
sa aki'y nagdulot ng pulot sa umaga
ang mga bibig mong kasing lambot
ng hinagkang pulang mansanas,
kasing lapot ng nagmamadaling tsokolate,
kasimbango ng ulang kasasabog pa lamang,
halik sa aking labi
ang s'yang nagpapaalala
nitong nadaramang
lumbay...